2006/3/18
Egindako lana aberatsa eta aberasgarria izan da, batzuek eta besteek egindako ekarpenak bildu, beste urteetako esperientzia eta balorazioak jaso, Gazte Topagunea ’06 ahalik eta parte hartzaileena izan zedin formulak sortu, eta abar.
Hala ere, topagunearen egitaraua ez da soilik azken hilabeteetako lanaren emaitza, baizik eta, egunez egun eta urte osoan zehar, euskal gazteriaren borrokaren ispilu.
Gazteok, egunero eraikitzen dihardugu beharrezkoa dugun Euskal Herria. Egunero eta ehunaka gazteren esku hartze eta lanari esker. Egunero posiblea egiten du gazte borrokak herri honen biziraupena. Gure egoera irauli eta etorkizuna eraikitzen dugu gure eskubideak geureganatuz eta gure beharrak asez; Guk geuk gestionatuz. Guztion parte hartzeari esker posiblea egiten ari gara Euskal Herriak behar duen eraldaketa. Posiblea, gazteok behar dugun Euskal Herria.
Borrokan gauden gazte guztiok gabe ez litzateke posiblea Gazte Topagunea ospatzea. Ez luke zentzurik, inongo borrokarik gabe aldarrikapen ekitaldi masiborik egitea. Ez luke zentzurik, aldarrikapenik gabeko, borrokaren ondoriorik gabeko, Gazte Topagunea ospatzea. Gazteon borrokaren ondorio baita Gazte Topagunea. Gazteon eskubideen esku hartzearen borrokaren isla. Guk geuk, gazteok, egunik egun egiten dugu, beraz, posiblea Gazte Topagunea.
Emaitzak ere, egindako ahaleginaren tamaina berean jasotzen ari gara, ahalik eta parte hartze zabalena izan zezan abiatutako atxikimendu dinamikak arrakasta ikaragarria izaten ari da, jada badira esparru eta Euskal Herriko txoko guztietako 700 gaztek baino gehiagok bere atxikimendua eman diotena, bai eta 500 gazte eragile inguru ere.
Honek egitasmo honexek duen errotze maila adierazten du, baina ez bakarrik Gazte Topaguneak bere 4 egunetako formatuan, Gazte Topagunearen atzean dagoen filosofia, konpromiso eta sinismen sendoari eman diogu atxikimendua. Independentziaren aldeko aldarrikapenak batzen gaitu!
Lau egunetako egitaraua
Lau egunetako egitarauari dagokionean, badira hainbat elementu azpimarratu nahiko genituzkeenak, haien artean, Igandea Aberri Eguna izanik, Etxarrin tarte berezia egingo diogu ekitaldia ere burutuz, eta Astelehena Preso politikoen nazioarteko eguna izanik mahaingurua eta ekitaldia ere egongo da.
Egitarauak, bi helbururi erantzuten die. Batetik, Gazte Topagunean Independentzian bizi den herria irudikatzea, eta bestetik, Gazte Topaguneak izan beharreko filosofiari hau da, ahalik eta parte hartzaileena izateari erantzun beharra. Horretan oinarrituz, guneen banaketa eta egitarauaren antolaketa xumea baina partehartzailea prestatu dugu.
Bi motatako guneak egongo dira, batzuk egitarau propioa izango dutenak eta besteak zerbitzu eskaintza egitera mugatuko direnak.
Lehenengoen artean daude, Kultur Etxea, bertan Euskal Herrian dagoen eskaintza kulturalean sakonduko dugu, bai eta honen garapenerako aurkitzen diren oztopoak aztertu ere. Gune honetan ere kokatuko dugu, Nazioartetik gonbidatuta etorriko diren hainbat gazte eragileetako delegazioak, bertan haien errealitateaz, zein gazte antolakuntzaz, eta borrokaren zilegitasunaz arituko dira.
Herri Eskola, bertan Euskal Herriak behar duen herri eskolaren eredua irudikatuko dugu. Hezkuntza integrala eta Euskal Herrikoa eskainiko duena, euskal Currikulumaren gauzapen praktikoa bilakatu nahi dugu. Gune honetan, arlo desberdinak tratatuko dira: sozioekonomia, feminismoa, euskara... eta orokorrean herri honek dituen erronka nagusien azterketa egingo dugu. Erabili nahi den metodologia ere, honi erantzun nahi dio. Edukietan ezagutza zuzena bultzatuko da, hainbat irteera eginez, eta tailerrak bultzatuz.
Gaztetxea, Euskal Herriko gaztetxe eta gazte asanbladen gunea bilakatzeko asmoz, Gaztetxe eta gazte asanbladen borroken garapenerako, baliogarriak izan daitezkeen tailerrak burutuko ditugu. Gaztetxe eta Gazte asanbladen borroken erakusle izango delarik: desalojoak, okupazioak, kanpainak... baita, aurrera begira eta borrokak garapena izan dezan beharrezkoak diren eztabaidak bultzatuz, autogestioa, auzolana, koordinazioa... Musikak ere leku garrantzitsua izango du. Estilo eta tendentzia berriei lekua emango diegularik.
Azoka, herritarra eta alternatiboa. Bertan, Gazte Mugimenduak sortzen duena erakusteko, trukatzeko eta saltzeko aukera egongo da, bai eta eremu ezberdinetan gazte sorkuntza zabaltzeko aukera izan nahi du. Egun bakoitzean izaera propioa izango du, larunbatean fanzine, kamiseta eta abarrekin truke azoka egongo da, Igandean artisau gazteen txanda izango da, tailerrak ere bertan antolatuz eta Astelehenean baserritar gazteek ekoiztutako produktuak egongo dira salgai.
Herri gunean, Kale Animazioak izango du protagonismo berezia lau egunetan zehar, bertan ikuskizunak baina nagusiki egitarau parte hartzailea planteatu dugu: larrain dantza, jokoak, futbolin erraldoia, sabel dantza, world series herrikoiak, tirolina, eta abar luze bat.
Zerbitzuei dagokionez, gosarientzako eta bokatak jateko gune estalia izango da, menua jateko aukera ere egongo da jantoki herrikoian, akanpalekuan guztiontzako lekua eta bertan ere zerbitzu minimoak egongo dira, hala nola, iturriak, komunak, dutxak, ogia eta esnea erosteko aukera, eta abar. Osasun gunea eta Informazio gunea ere egongo dira guztion beharrak asetzeko asmoz.
Karpa erraldoiak, 20000 gazte biltzeko kapazitatearekin, gazteon elkargune izango da gauero gauero.
Eta nola ez, Gazte Topagunea ez litzateke dena izango musika gabe. Aurten ere musikak tarte nabarmena izango du Topagune osoan zehar. Eskaintza 3 gunetan gauzatuko dugu, Etxarriko kaleetan barna, gaztetxe gunean eta karpa erraldoian.
-Gaztetxean: Mikel Urdangarin, Banda Batxoki + Anger, Ari + Mix6t, Anje Duhalde
-Karpan: Ken 7, Obrint Pas, Etsaiak, Def Con Dos, Mouss et Hakim (Zebda ohiak), Berri Txarrak, Kuraia, Koma, Izate eta oraindik zehazteko geratzen zaigun beste talde bat. Hurrengo egunetan ezagutzera emango duguna.
-Herrian: Musikherrian parte hartzen duten 12 talde.
Egitarau erakargarria, parte hartzailea eta askatzailea osatu dugu, Euskal Herriko gazteriari zuzendua. Lau egunetan zehar, Independentziari bide emango diogu, Independentzian biziko gara, Etxarri askatuz, Euskal Herria askeago bihurtuko dugu!
Lotura: Gazte Topagunea Etxarrin (Egitaraua)
