MADRIL-. Ricardo Guerrari kartzelatik astean hiru egunez irteteko baimena eman dio Madrilgo Lurralde Auzitegiko Bosgarren Sekzioak. Erabaki hori Zaintza Auzitegiak, fiskalak eta Soto del Realeko tratamentu batzordeak duten irizpidearen aurka doa.
Guerrak, espetxetik irteten den bakoitzean bi baldintza bete beharko ditu. Batetik, "senitarteko batek jaso eta eramango du kartzelara". Bestetik, "baimenaren lehenengo goizean auzitegira joan beharko du, eta hurrengo bi egunetan tokian tokiko polizia-etxe batean aurkeztu beharko du".
Arturo Beltran tribunaleko presidentearen ustez, "preso horren historia begiratuz gero, pentsaezina da baimenak ematea".
Madrilgo Lurralde Auzitegiak, aldiz, bestelako iritzia du: "Bere zigorraren herena bete du dagoeneko, eta zortzi urte daramatza espetxean. Bere jarrera ona da, eta kultura eta lan alorrean garapenak egiten saiatzen da ikastaro desberdinak baliatuz". Auzitegi horren ustez, "baimen horiek ematea onuragarria da askatasunean bizitzeko bidea prestatzen joateko".
Halaber, baimen hori "behar den bezala" betetzen badu, 30 egun igaro ondoren bigarren baimen bat lortzeko aukera izango du. Baimen horrek, astean lau eguneko askatasuna emango dio, eta ez du auzitegian eta polizia-etxeetan aurkeztu behar izango.
Ricardo Guerrari 17 urteko kartzela zigorra ezarri zioten, 1998ko abenduaren 8an Aitor Zabaletari bihotzean labankada bat sartzeagatik. Zortzi urte daramatza espetxean.
Erabaki "lotsagarria"
Aitor Zabaletaren aita Javier Zabaletak, albistearen berri izan ostean, "lotsagarritzat" jo du erabakia, Euskadi Irratiari eginiko adierazpenetan.
